Özbekiston Respublikasi Mudofaa vazirligi

Tanlovning asosiy maqsadi — yoshlar bilan ishlash tizimini yanada takomillashtirish, yetakchilarning tashkiliy salohiyatini oshirish, harbiy jamoalarda ijtimoiy-faol muhitni mustahkamlash, shuningdek, eng namunali yetakchilarni aniqlab, ularni rag‘batlantirishdan iboratdir.

Mazkur bosqichda Mudofaa vazirligi, DXX Chegara qo‘shinlari, Favqulodda vaziyatlar boshqarmasi, Milliy gvardiya, viloyat Ichki ishlar boshqarmasi, viloyat Bojxona boshqarmasi hamda IIV Jizzax akademik litseyi boshlang‘ich tashkilotlaridan jami 15 nafar yoshlar yetakchilari ishtirok etdi.

Tanlov davomida ishtirokchilarning 2025-yilda amalga oshirgan loyihalari, erishgan yutuqlari, 2026-yil uchun mo‘ljallangan yangi tashabbuslari, fotoalbomlar, namunaviy hujjatlarning yuritilishi hamda test sinovlari bo‘yicha ko‘nikmalari baholandi. Shuningdek, yetakchilarning tashabbuskorligi, jamoa bilan ishlash tajribasi hamda harbiy xizmatchilar va yoshlar o‘rtasida ma’naviy-ma’rifiy ishlarni tashkil etishdagi natijalariga alohida e’tibor qaratildi.

Baholash jarayonida ishtirokchilarning yetakchilik mahorati, muammolarni hal etishdagi yondashuvlari, kommunikativ ko‘nikmalari va innovatsion takliflari malakali hay’at a’zolari tomonidan shaffof va ochiq tarzda ko‘rib chiqildi.

Qizg‘in bahs-munozaralarga boy tarzda o‘tgan tanlov yakunlariga ko‘ra:
•  1-o‘rin — Mudofaa vazirligiga qarashli harbiy qism yoshlar yetakchisi mayor Nuriddin Odilov,
•  2-o‘rin — Bojxona boshqarmasi yoshlar yetakchisi kapitan Sherali Muyassarov,
•  3-o‘rin — Favqulodda vaziyatlar boshqarmasi yoshlar yetakchisi leytenant Sardorbek Safarovga nasib etdi.
•  
G‘olib va faol ishtirokchilar O‘zbekiston yoshlar ittifoqi hamda Yoshlar ishlari boshqarmasining diplom va esdalik sovg‘alari bilan taqdirlandi.

Tanlovda eng yuqori natijaga erishgan ishtirokchi esa “Eng namunali boshlang‘ich tashkilot yetakchisi” respublika bosqichida Jizzax viloyati sharafini himoya qilish imkoniyatini qo‘lga kiritdi.

Markaziy harbiy okrug matbuot xizmati