O‘zbekiston va Qatarning Tamam International kompaniyasi o‘rtasida investitsiya hamkorligini rivojlantirish bo‘yicha muzokaralar

Tamam International — energetika, transport va logistika, turizm hamda sog‘liqni saqlash sohalarida yirik loyihalarni amalga oshirish bo‘yicha boy xalqaro tajribaga ega bo‘lgan Qatarning yetakchi investitsiya kompaniyalaridan biridir. Kompaniya transmilliy tashabbuslarda faol ishtirok etadi va Markaziy Osiyo mintaqasidagi ishtirokini mustahkamlashga katta qiziqish bildirgan.

Uchrashuv davomida ustuvor yo‘nalishlarda hamkorlikni kengaytirish istiqbollari hamda yirik investitsiya loyihalarini amalga oshirish imkoniyatlari yuzasidan konstruktiv fikr almashildi. Jumladan, elektr energiyasi ishlab chiqarish va taqsimlash tizimini rivojlantirish, logistika infratuzilmasini modernizatsiya qilish, turizm obyektlari va zamonaviy tibbiyot muassasalarini yaratish bo‘yicha aniq takliflar ilgari surildi.

Muzokaralar yakunida tomonlar o‘zaro manfaatli sheriklikni mustahkamlash va hamkorlikni yanada chuqurlashtirishga tayyor ekanliklarini tasdiqladilar. MIIT vaziri tashabbusi bilan ilgari surilgan loyihalarni tizimli ilgari surish maqsadida Tamam International kompaniyasi va tegishli vazirlik hamda idoralar vakillaridan iborat Ishchi guruh tuzishga kelishib olindi.