Quruvchi 401,3 mlrd soʻmlik kiyim-kechak va oziq-ovqat sotgan boʻlsa-ya!
2025-08-15 17:30:00 / Qo'mita yangiliklari
shunday_bolishi_mumkinmi?
Quruvchi 401,3 mlrd soʻmlik kiyim-kechak va oziq-ovqat sotgan boʻlsa-ya!
Soliq qoʻmitasi tadbirkorlar tomonidan elektron hisobvaraq-fakturalar (EHF) rasmiylashtirishda yoʻl qoʻyilayotgan qoʻpol xatolik va soliq qonunchiligi buzilishi holatlari haqida maʼlumot berib borishda davom etadi.
Bunday holatlar maxsus axborot-tahliliy tizim orqali aniqlanmoqda. U mavjud raqamli maʼlumotlar tahlili asosida EHFlarnig xavf darajasini real vaqt rejimida avtomatik tarzda belgilab beradi.
Misol uchun, 2025-yil aprel oyida turar joy binolarini qurish faoliyati bilan shugʻullanish uchun tashkil etilgan “Muhandis” MCHJ (nomi oʻzgartirilgan) 2025-yil iyul-avgust oylarida egaligida yoki ijrada koʻchmas mulki, transport vositalari mavjud boʻlmasa-da, 401,3 mlrd soʻm (QQS – 42,9 mlrd soʻm) miqdorida har xil turdagi oziq ovqat, qurilish materiallari, kiyim kechak, mebel mahsulotlari va hokazo realizatsiyasi boʻyicha EHF rasmiylashtirgan.
Yana bitta korxona “Lider” MCHJ (nomi oʻzgartirilgan) 2025-yil yanvar oyida ishlab chiqarish faoliyati bilan shugʻullanish uchun tashkil etilgan va iyul oyida faol ishchilar soni, omborxonasi, transport vositalari, ishlab chiqarish uskunalari mavjud boʻlmasdan 20,2 mlrd soʻm (QQS – 2,0 mlrd soʻm) miqdorida har xil turdagi qurilish materiallari realizatsiyasi yuzasidan EHFlar rasmiylashtirgan, shu bilan birga ushbu jamiyat EHFni rasmiylashtirish davridan boshlab bugungi kunga qadar ixtiyoriy tugatish holatida boʻlib, faoliyati davomida yirik miqdorda soliq toʻlashdan boʻyin tovlagan.
Eslatib oʻtamiz: elektron hisobvaraq-fakturalarning xavf darajasini aniqlash boʻyicha maxsus axborot tizimi hozirda test tartibida faoliyat yuritmoqda va aniqlangan holatlar boʻyicha hozircha hech qanday chora-tadbirlar koʻrilmagan.
Qo‘shilgan qiymat solig‘i ma’murchiligi departamenti